Финн – йӧгра войтырлӧн принцесса

Сыктывкарса университетысь студентка босьтіс войтырса «Мисс студенчества Финно-Угрии – 2016» конкурс вылын юртас.

Шуда юӧр воис Карелияысь, кӧні чукӧртчисны медся мича финн-йӧгра студенкаяс. Коми Республикалысь да Сыктывкарса университетлысь бур ним дорйис нёльӧд курса велӧдчысь менеджмент да предпринимательство факультетын Анастасия Васильева.

Карелияысь вермӧмӧн! Кос му тӧлысь кыкӧд лунӧ Петрозаводскын (Республика Карелия) муніс конкурс медся мича фин-йӧгра университетса студенткаяс костын «Мисс студенчества Финно-Угрии – 2016» ним вӧсна. Вермысьӧн лои миян Питирим Сорокин нима Сыктывкарса государственнӧй университетысь менеджмент да предпринимательство факультетын велӧдчысь Анастасия Васильева.

- Настя, висьталӧ, кутшӧм тшупӧдъясысь муніс конкурс?
- Медводз вӧлі дефиле ӧнія кадся паськӧмӧн да национальнӧй костюмӧн. Сэсся колӧ вӧлі дасьтыны видеовизитка, чужтысян ӧбряд да творческӧй номер. Нуӧдісны и интеллектуальнӧй конкурс – пресс-конференция. Ӧтпырйӧ шуа, мый ме медводдзаысь петкӧдча татшӧм конкурсын. Таво буретш меным сюри позянлун дорйыны вузлысь да ас республикалысь бур ним, мыйлы ме пырысь – пырь рад! Конкурс меным вӧлі зэв тӧдчанаӧн, сы вӧсна мый кажитчӧ сьывны комиӧн, а медсясӧ батьлысь, Алексей Генлысь, сьыланкывъяс.

- Мый тэныд колӧ вӧлі дасьтыны быд тшупӧд вылын?
- Творческӧй тшупӧд вылын ме сьылі эстрада сьыланкыв «Со и торйӧдчим ми» («Вот и расстались мы», кывъясыс Евгений Козловлӧн, шыладыс Алексей Генлӧн). Тайӧ сьыланкывйыс коми кыв вылын, кӧні висьтавсьӧ радейтана морткӧд торйӧдчӧм йылысь. Ме зіли кыдзи бурджыка петкӧдлыны сьӧлӧм вӧрзьӧдана юкӧнсӧ. Чайта, мый менам ставыс артмис. Интелллектальнӧй конкурс муніс пресс-конференция моз. Быд участницалы колӧ вӧлі висьтавны ас йывсьыс да костюмлӧн аслыспӧлӧслун йылысь. Менам костюмӧ пырис вӧнь, коді лоӧ видзӧгӧн. Медся интереснӧй, аслыспӧлӧсӧн ме вылӧ лои чужтан ӧбряд. Кодкӧ участницаясысь петкӧдліс чужтӧм бӧрся ӧбряд, а кодкӧ – чужтӧмӧдз. Ми дыр мӧвпалім, мый петкӧдлыны миян. Бур, мый ставис артмис кокниа да гажаа. Видеовизитка лои дасьтӧма Студенческӧй телевидениекӧд ӧтвылысь.

- Кутшӧм сӧлӧмкылӧмъяс чужисны, кор шуисны, мый тэ лоин вермысьӧн?
- Медбӧръяӧдз майшаси, мый буретш ме лоа вермысьӧн тайӧ конкурсас. Кор шуисны менсьым нимӧс, ме вӧлі зэв ёна рад! Юртас козьналіс меным колян вося финн-йӧгралӧн мисс. Менам нинӧм бы эз артмы отсасьысъястӧг. Кӧсъя висьтавны ыджды аттьӧ Катюша Шангиналы, коді вӧлі мекӧд пыр дорся конкурс вылын став кадсӧ да быдлаын отсаси меным. Торйӧн аттьӧала отсассьыс котырӧс, Петрозаводскӧй государственнӧй университетысь филология факультетса студентъясӧс!

- Кодкӧд конкурс вылын ковмис вермасьны?
- Ставнас ми вӧлім кӧкъямыс нывка. Быдӧн колана ногӧн петкӧдліс ас войтырлысь традицияяс и ставлӧн вӧлі ӧткодь позянлун вермыны. Ми ёртасим медводдза репетиция дырйи на. Сійӧ вӧлі зэв бур, мый ми эг сӧмын вермысьӧй, но и мыджӧдалім ӧта-мӧднымӧс. Медым петкӧдчыны тайӧ конкурсас колӧ кӧсйӧм да, дерт, колӧ радейтны ас войтырлысь кыв да традиция.

- Мый медсясӧ тэныд коли вежӧрӧ?
- Кажитчис Карелияын национальнӧй сьылан-йӧктан ансамбль «Кантеле». Ансамбльысь артистъяс велӧдісны миянӧс национальнӧй йӧктӧмӧ. Тайӧ вӧлі зэв коланаӧн да бур уджӧн. Карелияын меным ёна кажитчис. И поводдя миянӧс гажӧдіс. Ветлім Шелтозерскӧй музейӧ, кытчӧ колӧ вӧлі мунны машинаӧн Петрозаводсксянь Шелтозеро грездӧдз час да джын. Сэні миян висьталісны вепсъяслӧн традицияяс йылысь. Тӧдмалім нӧдкывъяс вепс кыв вылын, гажӧдчим важ традиционнӧй ворсӧмъясӧн да калиткаӧн юим чай. Калитка – тайӧ карелъяслӧн национальнӧй сёян, коми шанька кодьӧсь.
- Настя, зэв ыджыд аттьӧ сёрниысь. Став бурсӧ тіян да водзӧ вылӧ выль вермӧмъяс.

Юлия РЕВЯКИНА

комиöдic Анна МАХОТИНА

Интервью сетысьлӧн архивысь фотояс

ИА VERBUM